撰文韋然 協力熊偉娟 相片提供TVBI

香港男香港女醒目之處，乃在於轉軚轉得快，呢樣「唔掂」，就立刻將軚盤一轉，前路立即柳暗花明，提升 level，一早成為香港九龍新界再「踏住上」進軍大中華區之超市師奶重量級殺手馬浚偉，是具有香港未來特首風範之港男代表，至少，他不會像慳電曾那麼死牛一面頸，錯咗都要死撐，唔通變得通。樂壇發展不順利，便轉戰電視圈，最終從「二打六」歌手，變成具皇者風範的電視皇帝。

屋邨仔、潮斵州仔，唱歌好巴閉

和馬浚偉也許算得是「識於微時」，認識幾多年就真係唔想講，一講，大家就有數得計 : 「嗯，馬仔都成四張㗎啦，點解佢重生得咁靚仔 ? 」。 老實說，筆者第一次訪問馬仔之時，佢重係啱啱唱完最鬼咁難唱的《李香蘭》，還剛剛拿到個歌唱大獎。同佢傾開偈才知佢原來係來自屋邨，係一個會講潮語的屋邨仔。佢唱歌好巴閉，未參加比賽之前，已經唱遍沖涼房騎樓底屋邨花園仔麵包舖仔，街坊同左鄰右里，個個都知道佢係唱得之人。得到唱歌大獎，一早就係意料中事，但人算不如天算，錯就錯在「他不是黎明，他不是張學友」，一句似為掂過碌蔗的宣傳精句，幾乎打到馬仔信心無晒，俾人噓到閂埋房間喊餐飽，自尊心無晒。

當年訪問完馬仔，見佢靚靚仔，好有星味，但係就成日俾人噓，好戥佢唔抵，忍唔住讚佢兩句，話佢「書卷味濃，氣質不凡，具皇者風範，他日必成器」，重叫佢唔使理人地噓聲，自己有料就 OK。

馬仔果然有料到，出道 16 年，由寂寂無名的小歌星，到現在穩坐無綫一線小生的地位，做正電視皇帝。成功的背後，馬浚偉嘗透了人生的苦與酸，有苦佢自己知，我地唔知。還好，得到上天的眷顧，最終都是苦盡甘來。

「被歌迷足足噓了兩年，流過眼淚，自尊心跌至谷底，但我從來沒有怪責唱片公司，因為少了這些經歷，就不能練就我一身好武功。」這種皇者豁達，正是慳電曾必須學習之對象。

馬仔生命中兩個最重要的女人

千里馬仔也須伯樂之顧，在樂壇跌了一跤又一跤，鬱鬱不得志的馬仔歌星夢碎，正當他準備退出娛樂圈之際，卻得到無綫高層曾勵珍賞識，鼓勵他拍電視劇。在 95 年，一齣《壹號皇庭 IV》扭轉了馬仔的命運，從此他不再是「二打六」歌手，變成了電視台當紅炸子雞，為拍劇忙得天昏地暗，名與利滾滾而至。

「無論是做人還是演戲，珍姐都教曉我很多，我永遠都會尊重她。」

除了曾勵珍，馬仔生命中最重要的女人，必定是他已經離逝了的母親。馬媽媽患有鼻咽癌二十二年，病情反覆，情況最嚴重的時候，嗅覺、味覺和聽覺也失去了，只剩下一隻眼晴的視力，馬仔看著母親活在痛苦中援助無手，難過到極點。

不過，凡事也有兩面，馬仔的母親雖然飽受疾病折騰，但她得到比失去的更多，家人無微不至的關懷，加上丈夫至死不渝的愛情，這些都令馬仔體會極深，令他覺得世間上還有永恆的愛情，縱使可能要花上一生的時間去尋覓。

「我絕對相信這個世界還有真愛，只要大家都以真誠的心付出感情。」

除了愛情，馬仔認為親情同樣重要。

「父母、子女，親情間無私的愛，血濃於水的感情，是最寶貴的東西。」

剛剛為無綫拍完《誘情轉駁》，馬仔的工作稍為輕鬆下來，但為了準備遲些時候參與的慈善比賽及《歡樂滿東華》節目，他最近正積極備戰練習打羽毛球，更因此而扭傷了右手腕。

繼續唱歌 ? 做出版「傷人」?

今年十二月，馬仔將會為無線拍攝一個飲食特輯，更打算「重操故業」推出唱片，希望為自己尋回應有的尊重。

「我要告訴大家，馬浚偉不是全職的歌手，他是全面的藝人，唱歌只是他演藝事業其中的一部份。」

事業正如日方中，但馬仔已經未雨綢繆，為將來的發展路向定下大計。當年第一份工作做教科書推銷員，計劃 40 歲之後逐步淡出娛樂圈，抽多點時間放在出版行業上，早於9年前已經創立了自家的出版社，並撰寫了《點解要自殺？》、《我是病人家屬》及《向好走向壞走》三本書，遲些他更會推出兩本關於飲食及香港近代歷史文化的書。

當年，我說他「書卷味濃」，真想不到馬仔竟然志氣及膽量過人，再搞出版社，當年蝕到入肉的苦果當等閒事，「跌倒依然勇，馬仔勁過人!」你係得的 !

出版商人十個變「出版傷人」，唔通馬浚偉真係有書卷味之 DNA，唔做文化事業唔開心 ?

馬仔在月初來到溫哥華，為「溫哥華華裔小姐競選2009」擔任表演嘉賓，大家有機會欣賞到馬仔的歌聲，同這位靚仔視帝進行近距離接觸啦 !